သူမ ငယ်ငယ်တုန်းက အဒေါ် ကျောင်းဆရာမနဲ့ ကြီးပြင်းခဲ့ရသူပီပီ သူငယ်တန်းမတက်ခင်မှာ သင်ပုန်းကြီးကို ပိုင်နိုင်ခဲ့တယ်..သူမအတွက်တော့ ဆရာ၊ ဆရာမ ဆိုတာ ချစ်စရာ.. လေးစားစရာ ..အားကိုးစရာပေါ့...ဒါပေမဲ့ သူမရဲ့ အဲဒီ ယုံကြည်ချက်တွေကို ဒုတိယတန်းမှာပဲ ရိုက်ချိုးခံခဲ့ရတယ်။
ဇာတ်လမ်းအစကတော့ သူမနဲ့ သူမ အကိုရဲ့ ပျော်ရွှင် မြူးတူး ခုန်ပေါက်စွာ အိမ်ကို ပြန်လာခဲ့ရာက စတယ်။ သူမတို့ မောင်နှမတွေ အကုန်လုံးက ပတ်ဝန်းကျင်က ချီးကျူးရအောင် လိမ္မာခဲ့ကြတယ်။ စည်းကမ်းကြီးတဲ့ ဖခင် ရဲ့ အုပ်ထိန်းမှု အောက်မှာ အိမ်အလုပ်ကို ၀ိုင်းကူတဲ့ကြားက နှစ်တိုင်းဆုရခဲ့ကြတယ်။ အဲဒီနေ့ကလဲ မနှစ်က ဆုစရင်း တွေကို ကြေငြာတော့ သူမရော သူမ အကိုပါ ဆုရခဲ့ကြတယ်။ သူမက သူငယ်တန်းတုန်းကလဲ ပထမ၊ ပထမတန်းမှာလဲ ပထမဆိုတော့ နှစ်နှစ်ဆက်တိုက် ပထမရခဲ့တာပေါ့။ ကလေးတွေဆိုတော့လဲ ပျော်ရွှင်မှုကို မြိုသိပ်ရမှန်း မသိသေးတဲ့ အရွယ်တွေလေ။ အဲတော့ အိမ်ကို မရောက်ခင် လမ်းထိပ်ကထဲက သူမ ပထမ ရကြောင်းကို ခုနစ်သံချီ ဟစ်ပြီး အိမ်ဆီကို ပြေးလာခဲ့တယ်။သူမရဲ့ ပျော်ရွှင်သံဟာ သူများကို မနာလို ဖြစ်စေ မယ်ဆိုတာကို သူမ မတွေးတတ်ခဲ့ဘူးလေ။ အဲဒီနေ့က သူမရဲ့ အသံဟာ လမ်းထိပ်အိမ်က သူမရဲ့ သူငယ်ချင်း ချိုမရဲ့ အမေကို မနာလိုစိတ်တွေနဲ့ ပူလောင်စေခဲ့တယ်။ အမှန်တော့ သူမနဲ့ ချိုမက ငယ်သူချင်းအရင်းတွေလို့ ပြောရမှာပါ။ အဖေတွေကလဲ လုပ်ငန်းခွင်မှာ ရာထူးတူ၊ အိမ်ချင်းလဲ နီးတော့ သူမတို့ ကစားဖော်၊ ကစားဖက် တွေ ဖြစ်ခဲ့ကြတယ်။ ဒီအချက်တွေကပဲ အဲဒီ အန်တီရင်မှာ မနာလိုစိတ်တွေနဲ့ ပူလောင်ခဲ့ရှာတယ် ထင်ပါရဲ့။ အဲနေ့ကစလို့ သူမရဲ့ သူငယ်ချင်းမလေးက အရင်တုန်းကလို ညနေ ကျောင်းဆင်းချိန်တွေမှာ သူမတို့နဲ့ လာမကစားတော့ ဘူး။ သူမတို့ကလဲ သိပ်တော့ သတိမထားမိပါဘူး။ မောင်နှမ နှစ်ယောက် ကစားနေရရင် အားလုံးကို မေ့နေ တတ်ကြတာကို။
အဲလိုနဲ့ သူမတို့ ဒုတိယတန်း ပထအစမ်း စာမေးပွဲ ဖြေရမဲ့အချိန်ကို ရောက်လာတယ်။ သူငယ်တန်း မတတ်ခင် ကထဲက စာကို ပိုင်နေခဲ့တာဆိုတော့ သူမက ဒီစာမေးပွဲကို စိတ်တိုင်းကျပဲ ဖြေဆိုနိုင်ခဲ့တယ်။ သူမကို ချစ်တဲ့ လက်ထောက် ကျောင်းအုပ်ကြီးက သူမကို ပွေ့ချီပြီး သူမ ဖြေတာ ဘယ်လောက် တော်ကြောင်း ချီးကျူးခဲ့တယ်။ သင်္ချာနဲ့ အင်္ဂလိပ်မှာ အမှတ် (၁၀၀) ရကြောင်း၊ ပထမရကြောင်းကို သီတင်းကျွတ် ကျောင်းပိတ်ရက် ဈေးမှာ သူမရဲ့ အမေနဲ့တွေ့တော့ ၀မ်းသာအားရ သတင်းပေးခဲ့တယ်။ အဲတော့ ပထမရမယ်ဆိုတာ ကျောင်းမဖွင့်ခင် ကထဲက သူမက ကြိုသိနေခဲ့တယ်။ ဒါဟာ သူမအတွက် ၀မ်းနည်းစရာတွေ ဖြစ်လာလိမ့်မယ်လို့ မထင်ဘူးလေ။ ဒါပေမဲ့ ကျောင်းပြန်ဖွင့်လို့ အမှတ်တွေလဲ ကြေငြာရော သူမက ဒုတိယရပြီး ချိုမက ပထမ ရနေခဲ့တယ်။သူမ ငိုပြီး အိမ်ကို ပြန်လာတော့ အံ့အားသင့်နေတဲ့ မိဘတွေက သူတို့ရဲ့ မကျေနပ်ချက်ကို မြိုသိပ်ပြီး သမီး လျှမ်းသွား လို့ ဖြစ်မှာပါလို့ အားပေးခဲ့ကြတယ်။ အစိမ်မှာ ထပ်ကြိုးစားဖို့ တိုက်တွန်းခဲ့ကြတယ်။ သူမကတော့ ကလေးဆိုတော့ ဘာမှ မသိပေမဲ့ မိဘတွေကတော့ အခြေအနေကို ရိပ်မိနေခဲ့မှာပေါ့။ပထမ မရတာကိုဝမ်းနည်း တာ မကျေနပ်တာကလွဲရင် သူမရဲ့ ဆရာ၊ ဆရာမတွေအပေါ် ယုံကြည်ကိုးစားမှုကတော့ မပျက်ခဲ့ ပါဘူး။ ဒါပေမဲ့ တစ်ရက်မှာတော့ .....
အဲဒီနေ့မနက်က အတန်းပိုင်ဆရာမ က ကျောင်းမလာတဲ့အတွက် ဒုကျောင်းအုပ်က အစားဝင်ပေးခဲ့တယ်။ ဆယ်၊ ခု ဇယားလေးတွေနဲ့ တွက်ရတဲ့ သင်္ချာ ပုစ္ဆာလေးတွေကို ကျောက်သင်ပုန်းပေါ်မှာ ရေးပေးခဲ့ပြီး၊ပြီးအောင် တွက်ဖို့ မှာခဲ့ပြီး သူ့ရဲ့ အတန်းရှိရာကို ပြန်သွားခဲ့တယ်။ မတွက်တတ်တဲ့ သူငယ်ချင်းတွေက သူမဆီကကူးချဖို့ သူမ နားမှာ ၀ိုင်းလာခဲ့ကြတယ်။ ပထမရတဲ့ ချိုမ အပါအ၀င်ပေါ့။ အဲဒီမှာ သူမရဲ့ ညစ်တဲ့စိတ် လေး ပေါ်လာ တာပါပဲ။ တခြားသူငယ်ချင်းအားလုံးကို ကူးခွင့်ပြုပေမဲ့ ချိုမကိုတော့ နင်က ပထမရတာပဲ ကိုယ့်ဟာကိုယ်တွက် ဆိုပြီး လုံးဝမပြခဲ့ဘူး။ တခြားသူငယ်ချင်းတွေကလဲ သူမဘက်က နာနေကြသူတွေပီပီ ချိုမကို ပထမရပြီးတွက်လဲ မတွက်တတ် ဘူး ၊ ဘာညာနဲ့ ၀ိုင်းလှောင်ကြပါရော။ ပထမဆုရှင် ချိုမဟာ သူမကိုလဲ ပြန်မပြောရဲတော့ သူမရဲ့ နောက်သူငယ်ချင်းတစ်ယောက်နဲ့ ရန်သတ်ကြပါလေရော။ သူမကတော့ ပွဲကြည့် ပရိသတ်ပေါ့။ ဒါတွေရဲ့ အကျိုးဆက်ကတော့ နေ့လည် ထမင်းစားချိန် သူမတို့ မောင်နှမ အိမ်ပြန်ပြီး ထမင်းစား ကြချိန်မှာ ချိုမရဲ့ အမေ အိမ်ကို ရောက်လာခဲ့တာပဲ။ ထမိန်စွန်တောင်စွဲထားတဲ့ အန်တီ ဟာ လက်တစ်ဖက်မှာ သူ့သမီးကို ဆွဲပြီး ရောက်လာခဲ့တယ်။သူမက သူ့သမီးကို ကျောင်းမှာ အနိုင်ကျင့်ပါ သတဲ့။ အဲတုန်းက သူမ ကိုယ်တိုင် ခုထိတိုင် အံ့သြစေရမဲ့ အပြုအမူတစ်ခုကို သူမ လုပ်ခဲ့မိတယ်။ ဒေါသရဲ့ စေခိုင်းချက်အရ မခံချင်စိတ်နဲ့ သူမဟာ အမေ နှစ်ယောက်စလုံးရဲ့ ရှေ့မှာပဲ ချိုမရဲ့အင်္ကျီကော်လံကို ကိုင်ဆွဲပြီး နင့်ကို ငါ ဘာလုပ်လို့လဲလို့ မေးခဲ့တာပဲ။ အဲဒီ မှာ ချိုမရဲ့အဖြေဟာ သူ့အမေကို ပါးစပ်ပိတ် သွားစေခဲ့တယ်။ တခြားလူနဲ့ ဖြစ်တာပါလို့ ပြောလာတဲ့ သူ့သမီး ကို ဒေါသထွက်နေတဲ့ သူ့အမေဟာ သူမတို့ကိုလဲ မပြောသာ တော့ စိတ်ဆိုးဆိုးနဲ့ ပြန်သွားခဲ့တယ်။ မေမေက လဲ ကျောင်းပြသ၁နာကို ကျောင်းမှာပဲ ရှင်းပါ ဆိုတဲ့ စကား တစ်ခွန်းနဲ့ ဇာတ်လမ်းရပ်စေခဲ့တယ်။ ဖေဖေနဲ့ မေမေကတော့ ကျောင်းမှာ ဆရာမတွေက မေးရင် သေချာဖြေဖို့ပဲ မှာခဲ့တယ်။ ဖြစ်လာနိုင်တဲ့ အခြေအနေကို မေမေတို့များ ကြိုသိနေခဲ့သလားလို့ ခုချိန်မှာတော့ သူမ တွေးနေမိတယ်။
နေ့ခင်းပိုင်း သူမတို့ ကျောင်းကို ပြန်သွားတော့ ချိုမ အမေဟာ ကျောင်း စာသင်ခန်းထဲမှာ ရောက်နေခဲ့တယ်။ သူမတို့တွေ ငါးမူး၊ တစ်မတ်ပဲ မုန့်ဖိုးရတဲ့ အချိန်မှာ အန်တီဟာ အခန်းထဲက ကလေး အချို့ကို ၅ကျပ်တန်တွေ ဝေပြီး စည်းရုံးနေခဲ့တယ်။ ချိုမကို ပေါင်းကြဖို့ပေါ့။ မနက်က ချိုမနဲ့ ရန်ဖြစ်ခဲ့တဲ့ သူမရဲ့ သူငယ်ချင်းရယ်.. ၀ိုင်းရီ ခဲ့ကြတဲ့ သူငယ်ချင်းအချို့ကတော့ ကြောက်နေကြပြီပေါ့။ အဲဒီ အန်တီက ဆရာမကို တိုင်မယ်လို့ ပြောတာကို။ သူမကတော့ အပြုံးမပျက်ပါပဲ။ ဆရာ၊ ဆရာမတွေက အမှန်ကို သိတာပဲလေ။ စာခိုးချတာကို မပြတာ မှန်တယ် ဆိုပြီး သူမကိုတောင် ချီးကျူးအုန်းမယ်လို့ သူမက ထင်ခဲ့တာကို............
ဒါပေမဲ့..........အဲနေ့က အတန်းပိုင်ဆရာမက သူမတို့ကို တစ်ခွန်းမှ မမေးခဲ့ပါဘူး။ အဲဒီ အန်တီ ပြောသမျှကို ခေါင်းညိတ် နားထောင်ခဲ့ပြီးနောက် သူမရယ်၊ နောက်ထပ် တခြား သူငယ်ချင်း သုံးယောက်ရယ်ကို ခုံပေါ်တက် မတ်တပ်ရပ် ခိုင်းခဲ့တယ်။ ဖြေရှင်းခွင့် လုံးဝမပေးခဲ့တာရယ်၊ ချိုမကိုတော့ မရပ်ခိုင်းပဲ သူမတို့ကိုပဲ ရပ်ခိုင်းခဲ့တာ အတွက် သူမ ဆရာမကို သိပ်စိတ်ဆိုးခဲ့တယ်။ ဆရာ၊ ဆရာမဆိုတာ အခုလို မတရားလဲ လုပ်ပါလားလို့ သူမ နာကျင်ခဲ့ရတယ်။ အဲ့နေ့က ဆရာမ ထိုင်ခိုင်းတဲ့ အချိန်မှာတောင် လုံးဝ မထိုင်ပဲ ဆက်ရပ်နေတဲ့ သူမကို ဒု ကျောင်းအုပ်ကိုယ်တိုင် ချီပြီး စာသင်ခန်းထဲက လာခေါ်ခဲ့ရတယ်။ ငိုလဲ မငိုပဲ အတောင့်လေးတိုင် ဖြစ်နေတဲ့ သူမကို ဆရာကိုယ်တိုင် အိမ်ကို လိုက်ပို့ခဲ့ရတယ်။ အဲဒီက ဖြစ်လာတဲ့ အကျိုးဆက်တွေဟာ သူမ အတွက် ပြန်မတွေးချင်လောက်အောင် အဲဒီကျောင်းလေးနားကို ယောင်လို့တောင် မသွားချင်လောက်အောင် ခါးသီးခဲ့ ရတယ်။ နေ့စဉ် အပြစ်ရှာနေတဲ့ ဆရာမရယ်၊ ခေါင်းမာစွာနဲ့ ဆရာမကို ရွဲ့ချင်တဲ့ သူမရယ် အကြိမ်များစွာ ထိပ်တိုက်တွေ့ခဲ့ကြတယ်။ ဒုကျောင်းအုပ်ဆရာရဲ့ ထိန်းပေးမှုကြောင့် ဆိုးဆိုးဝါးဝါး ထပ်မဖြစ်ခဲ့ပေမဲ့ စာမေးပွဲ ပြီးပြီးချင်းမှာပဲ ဖေဖေဟာ သူမကို ကျောင်းပြောင်းပေးခဲ့တယ်။ ကျောင်းအုပ်နဲ့ ဒုကျောင်းအုပ် တားနေတဲ့ကြား က ဖေဖေဟာ သူမကို ဇွတ် ကျောင်းပြောင်းပေးခဲ့တယ်။ ဒုတိယတန်းမှာ သူမ တတိယ ရခဲ့ပါတယ်။ ဒါပေမဲ့ သူမမှာ ဆုတံဆိပ် မရှိဘူး။ ဘာလို့လဲ ဆိုတော့ သူမက သွားမယူခဲ့လို့ပဲ။ ကျောင်းတွေရဲ့ ထုံးစံအရ လာမယူ ရင် ပို့ပေးသင့်ပေမဲ့ သူမဆီကို အဲဒီ ဆုတံဆိပ် ရောက်မလာခဲ့ဘူး။ သူငယ်တန်းကနေ ၁၀ တန်းအထိ ရခဲ့ ဆုလက်မှတ်တွေ နေရာမှာ ဒုတိယတန်း ကွက်လပ်လေးကို မြင်တိုင်း သူမဟာ အဖြစ်အပျက်တွေကို အမှတ် ရနေတတ်တယ်။
ဆရာမတစ်ယောက်ရဲ့ မတရားမှုကို တွန်းလှန်ဖို့ ကြိုးစားခဲ့တဲ့ ကျောင်းသူလေး တစ်ယောက် ရဲ့ ရာဇ၀င်ဟာ အဲဒီကျောင်းလေးမှာ နောက် (၁၀) နှစ်လောက် အထိ နံမည်ကြီး ကျန်ခဲ့တယ်။ အဲ့ကျောင်းလေးကို နောက်ပိုင်း ရောက်လာတဲ့ ဆရာမအသစ်တွေဟာ ကျောင်းနဲ့ မဝေးလှတဲ့ သူမတို့အိမ်ဆိုင်လေးကို ဈေး ၀ယ်သလိုနဲ့ လာပြီး သူမကို အကဲခတ် တတ်ကြတယ်။မြို့ကျောင်းမှာရော စာတော်သေးလားလို့ စုံစမ်းတတ်ကြတယ်။ ပတ္တမြားမှန်ရင် နွံ့မနစ်ရဘူးဆိုပြီး ထိန်းပေးခဲ့တဲ့ မိဘနဲ့ အန်တီ ဆရာမရဲ့ ကျေးဇူးကြောင့် သူမဟာ ဒီအချက် တွေကို တွန်းအားအဖြစ် အသုံးချတတ်လာခဲ့တယ်။ စာတော်နေမှ ဖြစ်မယ်ဆိုတဲ့ စိတ်နဲ့ ကြိုးစားခဲ့မှုကြောင့် သူမဟာ အခုအချိန်မှာ သင့်တင့်တဲ့ အောင်မြင်မှုတွေကို ပိုင်ဆိုင်နိုင်ခဲ့တယ်။ ဒါပေမဲ့ ဆရာဆိုတာ မတရားမှု လုပ်တတ်ပါလား၊ ဆရာ၊ဆရာမတိုင်းကို မလေးစားအပ်ဘူးဆိုတဲ့ ဆူးတစ်ချောင်း သူမရင်ထဲကို စိုက် ၀င်သွား ခဲ့တာကို လာဘ်စားပြီး မျက်နှာလိုက်ခဲ့တဲ့ ဆရာမတစ်ယောက်ရယ်၊ ဆရာမ မှားမှန်း သိပေမဲ့ တူမ ဖြစ်နေတဲ့ အတွက် မျက်စိ တစ်ဖက်မှိတ်နေခဲ့တဲ့ ကျောင်းအုပ်ကြီးရယ် အမှတ်ရနိုင်ပါအုန်းမလား။
No comments:
Post a Comment