London Eye က အမြင့်ပေ ၁၃၅ မီတာ ရှိပြီး ၁၉၉၉ ခုနှစ်မှာ စတင်တည်ထောင်ခဲ့တယ်။ စတင် တည်ချိန်မှာ ကမ္ဘာရဲ့ အမြင့်ဆုံး ရဟတ်တစ်စင်း ဖြစ်ပါတယ်တဲ့။ ၂၀၀၈ ခုနှစ်မှာတော့ စင်္ကာပူက ၁၆၅ မီတာ ရှိတဲ့ Flyer ဖွင့်လိုက်ချိန်မှာတော့ သူက အမြင့်ဆုံး မဟုတ်တော့ဘူးပေါ့။ စင်္ကာပူ flyer ကတော့ လွန်ခဲ့တဲ့ ၃ လလောက်က လေထဲမှာ အတော်ကြာ ရပ်တန့်ပြီး ခရီးသည်တွေ လေထဲမှာ တန်းလန်း ဖြစ်နေခဲ့ကြသေးတယ်။ဘာကြောင့် ဆိုတဲ့ အဖြေကတော့ ထုံးစံအတိုင်း မသိရပေမဲ့ အခုတော့ ပြန်ဖွင့်တော့မယ်လို့ ကြားတာပဲ။ လန်ဒန် မျက်စိမှာ အဲလို သမိုင်း ရှိ၊ မရှိကတော့ မသိပေမဲ့ လူတွေကတော့ အများကြီးပဲ လာနေလိုက်ကြတာ။ ကိုယ်လဲ လန်ဒန်မှာ ရောက်နေမှတော့ သွားသင့်တယ်လို့ ယူဆလို့ ဒီနေ့ ရောက်သွားဖြစ်တယ်။ ဒါပေမဲ့ ပိုက်ဆံပေးရမဲ့ အလုပ်ကို စိတ်မ၀င်စားသူပီပီ ၀င်တော့ မစီးဖြစ်ဘူး။ ပုံလေးတွေကတော့ အမှတ်တရပေါ့။
ဒုတိယပုံက Hungerford bridge ဘက်က ရိုက်ထားပြီး တတိယပုံကတော့ westminister bridge ဘက်က ရိုက်ထားတာ.. ရာသီဥတုက ဘယ်လောက်များ အပြောင်းအလဲ မြန်သလိုဆိုတော့ ဒုတိယပုံနဲ့ တတိယပုံကို ယှဉ်ကြည့်ရင် သိသာတယ်။ ဒုတိယပုံကို ရိုက်နေတုန်းက ရာသီဥတုက မှောင်နေပြီး တတိယပုံကို ရိုက်တော့ နေမင်းက ချစ်ချစ်တောက်ကို ပူနေတယ်။ ခြေတံရှည် ဆင်ရုပ်ကြီးကလဲ စိတ်ဝင်စားစရာပဲ။ လန်ဒန်မှာ တစ်ခု သတိထားမိတာက အဆောက်အဦးတွေက အခိုင်အခန့်ဖြစ်သလို ကျောက်ရုပ်ထုတွေလဲ အများကြီး တွေ့ရတယ်။ လူရုပ်အမှတ်တရတွေ အခုလို ဆင်ရုပ်တွေကို နေရာတော်တော်များများမှာ တွေ့ရတယ်။
No comments:
Post a Comment