ဘ၀မှာ အရေးပါဆုံးလူသားတွေကို ချရေးလိုက်မယ်ဆိုရင် ဘက်ညီတဲ့ ယှဉ်ပြိုင်ဘက်တစ်ဦးက အမှတ်စဉ် (၃) အောက် မနိမ့်တဲ့နေရာမှာ ယူမယ်ထင်တယ်။ ကိုယ့်ဘ၀မှာ ဘက်ညီတဲ့ ယှဉ်ပြိုင်ဘက်တစ်ဦး ရရှိခဲ့တဲ့အတွက် မင်းကို ကျေးဇူးတင်တယ်။ မင်းကြောင့် ကိုယ် ငိုကြွေးခဲ့ဖူးတယ်။ မင်းရဲ့ တဖက်သက် အနိုင်ယူတဲ့ စကားလုံးတွေ အောက်မှာ ကိုယ်ဟာ ရှက်ရွံ့စွာ၊ အားငယ်စွာ မျက်ရည်ကျခဲ့ဖူးတယ်။ မင်းကို မီအောင် ၁၀ နှစ်ကြိုးစားစမ်းပါ ဆိုတဲ့ ကလေးဆန်တဲ့ ယှဉ်ပြိုင်မှုတွေကြားမှာ စကားလုံးမရှိစွာ ကိုယ် နာကျင်ခဲ့ဖူးတယ်။ အားနည်းချက်ရှိတဲ့ ကိုယ်ဟာ အများအမြင်မှာ အံ့သြလောက်အောင် သည်းခံနိုင်ခဲ့ဖူးတယ်။ စကားလုံးတိုင်းကို နာကျင်စွာ (သို့) နာကျည်းစွာ ကိုယ်အမှတ်ရနေခဲ့ပေမဲ့ ဒီစကားလုံးတွေကပဲ ကိုယ့်ကို တွန်းအားတွေ ဖြစ်စေခဲ့တယ်။ ဘ၀မှာ သူငယ်ချင်းတွေနဲ့ ပတ်သတ်လာရင် အရင်းနှီးဆုံး မရှိဆိုတဲ့ အနေအထားဖြစ်သွားအောင် ကိုယ်ဟာ ဒဏ်ရာ ရခဲ့ဖူးတယ်။ ဒါပေမဲ့ မင်းသိရဲ့လား။ ကိုယ်အနေနဲ့ မင်းနဲ့ မင်းရဲ့ သူငယ်ချင်း တွေ နှုတ်ဖျားက ထွက်သမျှ စကားလုံးတိုင်းကို နာကျင်စွာ မှတ်မိနေပေမဲ့ မင်းကို မမုန်းခဲ့ဘူး။
မင်းဟာ ကိုယ့်ကို အမှန်တရားကို ရင်ဆိုင်ဝံ့အောင် ဖန်တီးပေးခဲ့သူ ဖြစ်နေလို့ပဲ။
မင်းရဲ့ ဘေးက မင်းကိုဝိုင်းပံ့ပိုးကြတဲ့ သူငယ်ချင်းတွေကို မုန်းသလောက်တောင် မင်းကို ကိုယ် မမုန်းခဲ့ဘူး။ ဒါမို့လဲ ပြန်တွေ့ရတဲ့ ခနမှာ ကိုယ်ဟာ ပြုံးရွှင်စွာ နှုတ်ခွန်းဆက် နိုင်ခဲ့တာပါ။ မင်းနဲ့ ပြန်တွေ့ရတဲ့ ခနမှာ ကိုယ် လွတ်လပ်စွာ ပျော်ရွှင်သွားမိတာလဲ အမှန်ပဲ။ ကိုယ်က “ငယ်ဘ၀ ပြိုင်ဘက်တွေ” လို့ ခပ်ဟဟပြောတော့ မင်းက ပြောတယ်။ “ကိုယ်က မင်းကို အမြဲ နိုင်နေတာပါ” တဲ့။ ဒီစကားရဲ့ နောက်ကွယ်မှာ နာကျင်မှုတွေ ရှိနေမလား။ သူငယ်ချင်း ရေ မင်းဟာ ကိုယ့်အတွက် သူငယ်ချင်းကောင်း ၊ ယှဉ်ပြိုင်ဘက်ကောင်း၊ ဘ၀မှာ လက်တွဲခဲ့တဲ့၊ လက်တွဲနေဆဲ ကိုယ့်ရဲ့ သူငယ်ချင်းတွေထက် အရေးပါသူ တစ်ယောက်၊ ကိုယ့်ရင်ထဲမှာ မင်းဟာ အမြဲ နေရာယူခဲ့ဖူးတယ်။ ဒါတွေဟာ မုန်းတီးမှုကို အခြေခံတာ မဟုတ်ဘူး သူငယ်ချင်း။ မင်းက ကိုယ့်အပေါ် ဘာတွေပဲ ဆိုခဲ့ပါစေ။ ကိုယ် မင်းကို ခင်ခဲ့တယ်။ နာကျင်မှုနဲ့ ခင်မင်မှုက ဘယ်လို ဆက်သွယ်နေလဲ ဆိုတာ ကိုယ် မသိဘူး။ ဒါပေမဲ့ ခံရတဲ့ လူမှာတော့ အလူးအလှိမ့်ပါကွာ။
ဒီနေ့ မင်းနဲ့ ကိုယ် ပြန်ဆုံတယ်။ (၁၈) နှစ်အတွင်း ပထမအဆုံး လှိုက်လှဲစွာ စကားပြောဖြစ်ခြင်းပဲပေါ့။ ဟုတ်တယ် ... ၁၈ နှစ်တောင် ရှိခဲ့ပြီ။ မင်းက ကိုယ့်ဘ၀ထဲက လုံးဝ ပျောက်ကွယ်သွားခဲ့တာတော့ ၁၀ နှစ်ပေါ့။ ဒီလောက် ဝေးကွာခဲ့ပေမဲ့ မင်းကို ကိုယ် လှိုက်လှဲစွာ စကားပြောနေနိုင်ဆဲပဲ။ မင်းကို ပြန်တွေ့ရလို့ ၀မ်းသာ တယ်။ ကိုယ့်အတွက်လဲ ၀မ်းသာတယ်။ ဘ၀က ပိုပြီး အဓိပ္ပါယ်ရှိသွားတယ်လို့ ခံစားလိုက်ရတယ်။
No comments:
Post a Comment