စိတ်မကောင်းဖြစ်ရသော နေ့

ဒီနေ့ စိတ်မကောင်း တော်တော်လေး ဖြစ်မိတယ်...မနက် မိုးလင်းလို့ မျက်လုံး နှစ်လုံး ဖွင့်လိုက်တော့ ကိုယ့် ကွန်ပျူတာမှာ MSN လေး၊ ငါး ခုကို တွေ့လိုက်ရတယ်ဆိုရင်ပဲ တစ်ခုခုတော့ မှားနေပြီလို့ သိလိုက်တယ်.. ပို့ထားတဲ့ မတ်စေ့ဂ်ျတွေကလဲ တစ်ခုထဲလေ..သတင်း တစ်ပုဒ်ဆီကို သွားမဲ့ Link ကို ပို့ပေးထားကြတယ်..ဒါနဲ့ ဖွင့်ဖတ်လိုက်တော့ NTU က ဆရာတစ်ယောက် ဒါးထိုးခံရလို့တဲ့..ကျောင်းသားက ဆရာ့ကို ဒါးနဲ့ ထိုးပြီး သူ ကိုယ့်သူ သတ်သေသွားတယ် ဆိုတော့ တုန်တော့ တုန်လှုပ်မိတယ်.. နောက် သေချာဖတ်လိုက်တော့မှ ဆရာ့ နံမည်က ကိုယ်နဲ့ အရမ်း ရင်းနှီးနေတယ်... ရင်ထဲမှာ နင့်နင့်သီးသီး ခံစားလိုက်ရတယ်.. ဖြစ်လာမဲ့ အကျိုးဆက် တွေ အတွက်လဲ ရင်ပူသွားတာ အမှန်ပဲ။

ဆရာ ဘာမှ မဖြစ်ပါစေနဲ့လို့ ဆုတောင်းရင်း စင်္ကာပူမှာ ရှိနေတဲ့ ဆရာ့ တခြား တပည့်တွေကို လှမ်းမေးမိ တယ်.. တစ်ယောက်မှ စကားမပြန်တော့ ပိုစိတ်ပူမိတယ်.. ဆရာသာ တစ်ခုခု ဖြစ်သွားရင်ဆိုတဲ့ အတွေးနဲ့ ဆရာ့ ကလေး ၂ ယောက်နဲ့ သူ့မိန်းမ မျက်နှာကို ပြေးမြင်ပြီး စိတ်မကောင်း ဖြစ်သွားတယ်.. ကိုယ်တိုင်လဲ သွားကြည့်လို့ မရတဲ့ အနေအထားမှာလေ..

နေ့လည် ၂ နာရီလောက်မှ ကိုယ့် senior က ဖုန်းခေါ်လာတယ်.. ဆရာ ဘာမှ မဖြစ်ဘူးတဲ့.. မနက်ဖြန် ဆေးရုံက ဆင်းရင် ဆင်းမယ် ဆိုမှ သက်ပြင်း ရဲရဲ ချမိတယ်... ရင်ထဲမှာတော့ စိတ်မကောင်းတာရော.. တုန်လှုပ်မိတာရော..ဘာတွေ ဖြစ်သွားမှန်းတောင် မသိတော့ဘူး။ သေသွားတဲ့ ကျောင်းသားအတွက်လဲ စိတ် မချမ်းသာသလို ဆရာ့အတွက်လဲ ရင်ထဲမှာ မကောင်းဖြစ်နေမိတယ်. သတင်းတွေအဆိုအရ ကျောင်းသားက စာအသင့်အတင့် တော်တဲ့ ကျောင်းသားဖြစ်နေတာရယ်.. Final year project အတွက် ဆရာနဲ့ ဆွေးနွေးနေရင်းက ဖြစ်တာရယ် ဆိုတော့ ဆရာလဲ တော်တော်လေး စိတ်မကောင်း ဖြစ်နေမှာပဲ။ နောက်တော့ ရုံးခန်းထဲမှာ ဘယ်ကျောင်းသားနဲ့မှ ဆရာတွေ ဆွေးနွေးရဲမှာ မဟုတ်ဘူး။

internet မှာတော့ ဒီသတင်းတွေ ပလူပျံနေတာပဲ။ တစ်ချို့ကလဲ ဆရာ့ကို အပြစ်တင်ကြတယ်။ ကိုယ့် junior ကတော့ ကျောင်းသားက စာလုံးဝ မလုပ်တာလို့ ပြောတယ်.. FYP အတွက် လုံးဝကို lab ကို မလာခဲ့ဘူးတဲ့.. ဘာပဲဖြစ်ဖြစ် ဖြစ်လာခဲ့ပြီ ဆိုမှတော့ ၂ ဘက်လုံးအတွက် ကြေကွဲစရာပဲပေါ့။ သေသွားတဲ့ ကျောင်းသားရဲ့ မိဘတွေ ညီအကို မောင်နှမတွေ အတွက်လဲ စိတ်မကောင်းစရာပဲ။ ဘာပဲဖြစ်ဖြစ်လေ ဆရာ့အတွက်ရော ကျောင်းသားအတွက်ရော..ပြီးတော့ ကျောင်းအတွက်ရော ဒါဟာ ရလဒ်ကောင်းတစ်ပုဒ်တော့ မဟုတ်နိုင်ဘူး။

၎-၀၃.. ဒီနေ့ ဆရာ့ကို အွန်လိုင်းတွေ့တယ်..ဆေးရုံက ဆင်းပြီတဲ့..လှမ်းနှုတ်ဆက်လိုက်ပေမဲ့ စကားတော့ အရှည်ကြီး မပြောဖြစ်ဘူး။ ဆရာ စိတ်မကောင်းဖြစ်နေတယ် ထင်တယ်..ဘာတစ်ခုမှ ဆိုးဆိုးဝါးဝါး ထပ်မဖြစ်လာပါစေနဲ့..