ဝိုင် သောက်ဖြစ်တဲ့ နေ့တစ်နေ့

ကိုယ် မနေ့က Campo Viejo ၀ိုင် နဲနဲ သောက်ဖြစ်သွားတယ်...ဆရာရဲ့ အတင်းအကြပ် တိုက်တွန်းမှုအရ မငြင်းချင်လို့ သောက်ဖြစ်သွားတယ်.

တကယ်တော့ ကိုယ်က alcohol ဆိုတာကို အစွန်းရောက် ဆန့်ကျင်သူတော့ မဟုတ်ပါဘူး။ အလွန်အကျွံ မသောက်ရင် ပီးတာပဲ သင့်သလောက် သောက်ဖို့ ဖေဖေ့ကိုတောင် တိုက်တွန်းခဲ့မိသေးတဲ့သမီးပဲလေ.. ကိုယ်တိုင်လဲ NTU undergrad အပြီး ညစာစားပွဲမှာ လက်တစ်လုံးလောက်သော ၀ိုင်လား ဘာလား မမှတ်မိတော့တဲ့ alcohol အနည်းငယ်ကို ကိုယ်သောက်ခဲ့ ဖူးတယ်။(စင်္ကာပူမှာ ပထမဆုံးနဲ့ နောက်ဆုံး သောက်ခဲ့တာပဲ)။ နောက် မမ မင်္ဂလာဆောင်တော့ အဖေ့ရဲ့ ခံစားချက်တွေ ထွက်ပေါက်ရဖို့ အဖေ သောက်မဲ့ ဝေစုထဲကနေ ကိုယ်ယူသောက်ခဲ့ဖူးတယ်။

ဒါပေမဲ့ ကိုယ်တို့ မြန်မာ မိန်းကလေးတွေ ၀ိုင်သောက်ရတာ..ဘီယာသောက်ရတာကို ဂုဏ်ယူစရာတစ်ခုလို လုပ်ပြီး သောက်နေရင်တော့ ကိုယ့်စိတ်မှာ ရှုံ့ချမိတာအမှန်ပဲ။ ကြိုက်လို့ သောက်တယ်ဆိုရင်တော့ ပြောစရာ မရှိပေမဲ့ ညစာစားပွဲတွေ တက်တဲ့အခါ သောက်နိုင်တာ သောက်တတ်တာကို ဂုဏ်ယူပြီး သောက်တာကိုတော့ စိတ်ပျက် မိတယ်။ ကျန်းမာရေးအရ၊ ယဉ်ကျေးမှုအရ အာစွတ်ရုံ သောက်ကြတာကိုတော့ အပြစ်ဆိုရလောက် အောင် ကိုယ်လဲ ခေတ်နောက်ပြန်မစွဲပါဘူး။ ဒါပေမဲ့ ကိုယ်တွေ့ဖူးသလောက် တစ်ချို့မြန်မာတွေက အဲလို သောက်တာကို ခေတ်မီတယ်..နိုင်ငံခြားသားတွေနဲ့ ရင်ဘောက်တန်းနိုင်တယ်ဆိုတဲ့ အစွဲမျိုး ခံယူချက်မျိုး ရှိနေသလိုပဲ။ alcohol ဆိုတာကို အအေးတစ်မျိုးလို သဘောထားလိုက်မယ်ဆိုရင် ဒီအရည်ကို သောက်ခြင်း မသောက်ခြင်းအပေါ်မှာ ဂုဏ်ယူ ၀ံ့ကြွားစရာ အချက်တစ်ခုမှ မရှိဘူး ထင်တယ်..

ဝင်ဆန့်မှုအတွက် သောက်တယ်ဆိုတာကို ကိုယ်တိုင်လဲ အသင့်အတင့်တော့ လက်ခံထားးပါတယ်.. အခုဆိုပဲ ကြည့်လေ..ဆရာက တိုက်တွန်းလာတဲ့အခါ ကိုယ်မငြင်းအပ်ဘူး ထင်တဲ့အတိုင်းအတာကို ကိုယ်လက်ခံ လိုက်တာပဲ။ ဆရာက ဘီယာလဲ စမ်းသောက်ကြည့်ဖို့ ကိုယ်သောက်သမျှ သူရှင်းမယ်ဆိုပြီး ဇွတ် ပြောပေမဲ့ ကိုယ်လက်မခံခဲ့ဘူး။ နောက် ၀ိုင်ကိုတော့ တစ်ပုလင်းလုံး မှာပြီး ၅ ခွက်ခွဲတဲ့ ပွဲမှာတော့ ကိုယ် မငြင်းအပ်ဘူးလို့ ယူဆလို့ သောက်ဖြစ်တယ်. ဒါပေမဲ့ အာရှနိုင်ငံ (အထူးသဖြင့် ရန်ကုန်)လို နေရာမျိုးမှာတော့ ၀င်ဆန့်မှု အတွက် သောက်ရတယ် ဆိုတာကို လက်သင့်ခံပေးလို့ မရနိုင်ဘူး။ စလုံး သူငယ်ချင်းတွေ ဆရာတွေ လူကြီး တွေနဲ့ ကိုယ် အကြိမ်ပေါင်း များစွာ ညစာစားပွဲတွေကို တက်ခဲ့ဖူးပါတယ်. alcohol (wine or beer) က အနောက်နိုင်ငံတွေမှာလို အဓိက အရေးပါတဲ့ အရာ မဟုတ်ဘူးလို့ ထင်တယ်.. ကိုယ်တို့တွေ ကြိုက်တဲ့ အရာကို ဘာလွှမ်းမိုးမှု ခြယ်သမှုမှ မပါဘဲ လုပ်နိုင်တဲ့သူတွေ ဖြစ်ပါစေလို့ ဆုတောင်းမိတယ်။