ဒီနေ့ ကိုယ်သာ တာဝန်ရှိသူ တစ်ယောက်ဆိုရင် ဘာဆက်လုပ်မလဲလို့ တွေးနေမိတယ်..ပထမ တစ်ခုက ဖြေရှင်းလို့ မပြီးသေးခင် နောက်တစ်ခု...ကျောင်းအနေနဲ့ ဒီကိစ္စကို တိတ်တိတ်လေး ပြီးဆုံးစေဖို့ ကြိုးစားနေ တယ်ဆိုတဲ့ စွပ်စွဲချက်တွေ...ကိုယ်ကတော့ အဲလို မထင်ပါဘူး..ကျောင်းအနေနဲ့ အကောင်းဆုံး ဖြစ်ဖို့ ကြိုးစားနေဆဲလို့ ယုံကြည်(ချင်)ပါတယ်..တကယ်လို့ တိတ်တိတ်လေး ပြီးဆုံးလိုက်မယ်ဆိုရင် ကျောင်းမှာ ရှိနေတဲ့ အင်ဒိုကျောင်းသားတွေရဲ့ စည်းလုံးမှုကို ဥပက္ခာ ပြုထားလို့ မရဘူးဆိုတာ ကျောင်းက တာဝန်ရှိသူတွေ အနေနဲ့ မသိ မဟုတ် ..သိနေကြမှာပဲ။ ဖြစ်လာမဲ့ အခြေ အနေတွေအတွက် အကောင်းဆုံး အဖြေတစ်ခုကို ထုတ်နေတာလို့ပဲ ထင်တယ်..
ဒီကိစ္စတွေဟာ ကျောင်းသားတွေ အတွက် ထွက်ပြေးဖို့ တိုက်တွန်းစေတဲ့ လှုံ့ဆော်မှုမဖြစ်ပါစေနဲ့လို့ ကိုယ်ဆု တောင်းပါတယ်..ကိုယ့်ရဲ့ အမြင်အရ စင်္ကာပူမှာ တက္ကသိုလ်တက်နေတဲ့ နိုင်ငံခြားသား ကျောင်းသားတွေရဲ့ဘ၀ ဟာ သိပ်တော့ မချောမွေ့တာ အမှန်ပဲ။ တခြားနိုင်ငံတွေမှာ ဘယ်လို ရှိလဲ ဆိုတာ တိတိကျကျ မပြောတတ် ပေမဲ့ ဒီနိုင်ငံမှာတော့ စလုံး ကျောင်းသားတွေဟာ ဖော်ရွေမှုနည်းတာ အမှန်ပဲ။ (ဆောရီးပါ စလုံးသူငယ်ချင်းတို့ ရယ်..ဒီစကားပြောရတာ မင်းတို့ကို အားနာပါတယ်) သူတို့ ကိုယ်တိုင်လဲ JC ကလာတဲ့ ကျောင်းသားနဲ့ Poly ကျောင်းသား ကွဲနေတာမျိုး..JC အချင်းချင်းကွဲနေတာမျိုး တွေ့ဖူးတယ်.
ကိုယ့်ရဲ့ ပထမနှစ်တုန်းက စလုံးအခန်းဖော် ဆိုရင် သူ့သူငယ်ချင်းတွေနဲ့ ကွဲလာပြီး စိတ်တွေလေ သင်းကွဲ ငှက် ဖြစ်..ပထမနှစ်ကို ၅ ဘာသာကျပြီး ကျောင်းပြောင်းသွားခဲ့တာကို ကြုံခဲ့ဖူးတယ်..တကယ်တော့ စလုံးတွေ ကိုယ်တိုင်လဲ တက္ကသိုလ်မှာ အဖော်မဲ့တဲ့ ခံစားချက်တွေ ရှိတယ်ဆိုတာကို ပြောပြချင်ပါတယ်.. အထူးသဖြင့် တရုတ်စကားကို မပြောနိုင်တဲ့ နိုင်ငံခြားသားတွေအနေနဲ့ပိုဆိုးပါတယ်.. တက္ကသိုလ်ဆိုတာ ပညာသာ မဟုတ် အပေါင်းအသင်းကိုပါ ရှာတဲ့ နေရာဆိုပေမဲ့ ဒီမှာ အဲဒီ အခွင့်အရေး ရဖို့ ခက်ပါတယ်..နောက်တစ်ခုက စာတွေ အနေနဲ့ကလဲ လိုက်နိုင်ဖို့ ကြိုးစားရပါတယ်.. အထူးသဖြင့် မြန်မာနိုင်ငံက ထိပ်တန်း ကျောင်းသားတွေအနေနဲ့ ဒီနိုင်ငံမှာ သတိထားဖို့လိုပါတယ်..ဟိုမှာ သိပ်တော်ခဲ့တဲ့ ကျောင်းသားတွေဟာ ဆရာ၊ ဆရာမတွေရဲ့ ဦးစားပေး မှုကို အမြဲရခဲ့ကြတာပါ။ ဒီရောက်တဲ့အခါကျတော့ ကိုယ်က သမုဒ္ဒရာထဲက ငါးတစ်ကောင် ဖြစ်သွားပါတယ်..နောက် ဦးစားပေးခံရတယ်ဆိုတာကလဲ စာတော်ရုံမက ၀င်ဆန့်နိုင်မှသာ ဖြစ်နိုင်တာဆိုတော့ ရောက်ခါစ တစ်နှစ် နှစ်နှစ်မှာ စိတ်ဓါတ်ကျမသွားဖို့ ကြိုးစားနိုင်မှသာ ဆက်လက်ရပ်တည်နိုင်ပါတယ်..နောက်တစ်ခု က စာလုပ်တဲ့ပုံစံပါ.. များသောအားဖြင့် ကိုယ်တို့ မြန်မာတွေဟာ စာကို ကပ်လုပ်တာကို အားသန်ပါတယ်. ကျောင်းဖွင့်စ ပထမ တစ်လလောက်ကတော့ လေနေချင်ပါတယ်.. ကိုယ့်ရဲ့ အမြင်အရ ဒီအချက်က ရေရှည် အတွက် မကောင်းနိုင် ပါဘူး။ တစ်ချို့ကျတော့ မြန်မာနိုင်ငံမှာ သင်ထားခဲ့ဖူးတဲ့ အခြေခံတွေအရ ပထမ၊ ဒုတိယနှစ်မှာ ကပ်လုပ်ပေမဲ့ အခြေအနေကောင်းပါသေးတယ်.တစ်ချို့ဘာသာတွေမှာ အမှတ်နဲပေမဲ့ တစ်ချို့ ဘာသာတွေက အမှတ်ကောင်းနေတော့ ကိုယ့်ကိုယ်ကို အထင်ကြီးသွားတတ်ပါတယ်.. ဒါပေမဲ့ အဲလို အခြေ မခိုင်ခဲ့တာအတွက် ခံရတာက တတိယနှစ်လောက်မှပါ။ အဲ့အချိန် မှာ စာမေးပွဲတွေ ကျ..စိတ်လေပြီး ၄ နှစ်နဲ့ ပြီးရမဲ့ ကျောင်းကို ၅ နှစ် ၆ နှစ် တက်ရတဲ့ ကျောင်းသားတွေလဲ ရှိပါတယ်.
မြန်မာနိုင်ငံက ၁၀ တန်းအောင်ပြီး တက္ကသိုလ်ကို တိုက်ရိုက် ၀င်လာကြတဲ့ မြန်မာကလေးတွေအနေနဲ့ အခု အဖြစ်အပျက်တွေကြောင့် အထိအခိုက်မခံကြဖို့ တိုက်တွန်းချင်ပါတယ်.. မြန်မာတွေ အချင်းချင်း စည်းစည်း လုံးလုံးလဲ ရှိစေချင်တယ်.. ကိုယ်က ဘာမှတော့ မဟုတ်ပါဘူး..ဒါပေမဲ့ senior တစ်ယောက်အနေနဲ့ အခုလို ဖြစ်ပျက်နေမှုအပေါ် အငယ်တွေ အတွက် စိတ်ပူမိတာအမှန်ပဲ။ ပြောရရင် ကိုယ့်ကို ကိုယ်လဲ စိတ်ပူပါတယ်.. ဒီ အဖြစ်အပျက်က ကိုယ့်အပေါ်မှာ တော်တော်လေးတော့ ရိုက်ခတ်မှု ဖြစ်တာ အမှန်ပဲ..
No comments:
Post a Comment