ကိုယ်က ကိုယ့်ဘ၀ကို ကျေနပ်မှုရှိပါတယ်ဆိုနေမှ မကျေနပ်ဘူးလို့ ထင်တဲ့လူက ရှိသေး။ တကယ်တော့ ကိုယ်တိုင်ကလွဲလို့ ဘယ်သူက သိနိုင်မှာလဲ။ ရီတော့ ရီရသေး။ ကိုယ်ကလဲ ဘယ်လို ပြောပြရမှန်းမသိ။ လူတစ်ယောက်က တကယ်လိုအပ်လာတဲ့ အချိန်မှာ သူ့ဟာသာ ရှာဖွေသွားမှာပါပဲ သူငယ်ချင်းတို့ရယ်။
အဲဒါနဲ့ ဆက်စပ်လို့ တွေးမိခဲ့တဲ့ အတွေးလေးကို စာစဉ်ကြည့်မိတော့............
တစ်ခါတုန်းက အမှတ်(၅) ကားပေါ်မှာ ဖြစ်ခဲ့တဲ့ အဖြစ်အပျက်လေးတစ်ခုရယ်ပါ။
တက်ကသိုယ်ကျောင်းက သူငယ်ချင်းတစ်စုပေါ့။ သူတို့ကိုယ်သူတို့ စာတတ်တယ်လို့ သိပ်ဂုဏ်ယူနေခဲ့တဲ့ အချိန်ပေါ့လေ။ သူတို့တက်ရတဲ့ ကျောင်းက မြို့ပြင်မှာ၊ ပတ်ဝန်းကျင်မှာ ရှိတဲ့ လူတွေက လက်လုပ်လက်စား ဆင်ရဲသား အများစု။ သူတို့ ကျောင်းကနေ မြို့ကို သွားဖို့ နံပါတ် (၅) ကားတစ်စီးပဲ ရှိတယ်။ ခရီးသည် အများစုက အနီးအနားရွာက ဆင်းရဲသား ဦးကြီး၊ ဒေါ်ကြီးတွေပေါ့။ သူတို့က မြို့ကို ဒီကားနဲ့ပဲ သွား၊ ဈေးဝယ် လုပ်ကြရတာကို။
တရက် အဲခုနက သူငယ်ချင်းတစ်စု မြို့ထဲကို နံပါတ်(၅)ကားနဲ့ သွားကြတာပေါ့။ လူငယ် သဘာဝ အသေးအဖွဲလေးက အစ ငြင်းရခုန်ရ ပျော်ရွှင်နေတဲ့ အချိန်ပေါ့။ အဲထဲမှာ ကိုယ့်ကိုယ်ကို မြန်မာစာ သိပ်တော်တယ်လို့ ကိုယ့်ကိုယ်ကို သွေးကြီးနေတဲ့ ကောင်မလေး တစ်ယောက်ပါတယ်။ သူက ရုတ်တရက် ကားနံရံပေါ်က စာတန်းလေးတစ်ခုကို လှမ်းမြင်လိုက်တယ်။ လက်မထုပ်ရ၊ ခေါင်းမထုပ်ရတဲ့။
သူက အဲတော့ ကိုယ့်ကိုယ်ကို စာတတ်တယ်ဆိုတဲ့ ယုံကြည်ချက်မျိုးနဲ့ ဝေဖန်ပါလေရော။ ဒီကားသမားတွေကလဲ အဲလိုရေးထားတော့ ဘယ်သူက နားလည်မှာလဲပေါ့နော်။ သူ့နားက သူ့သူငယ်ချင်း ပညာတတ်တွေကလဲ ၀ိုင်းဖတ်ပြီး ရီကြပေါ့။ ဟုတ်တယ်၊ ဘာညာပေါ့လေ။
အဲအချိန်မှာ အဒေါ်ကြီးတစ်ယောက်က ၀င်ပြောပါ လေရော။ သူတို့ကို အမြင်ကတ်စိတ်နဲ့ ပြောသလား၊ ရိုးသားစွာ သူ့အမြင်ကို ပြောသလားတော့ မသိဘူး။ အဲကောင်မလေးကတော့ ခေါင်းမဖော်ဝံ့အောင် ရှက်သွားခဲ့တယ်။ နောက်လဲ တော်တော် ဆင်ခြင်သွားခဲ့တယ်။ အဒေါ်ကြီး ပြောခဲ့တာက
'ညည်းတို့ကလဲ ဒါလေးတောင် မသိဘူးလားအေ။ ခေါင်းမထုတ်ရဆိုတာ ဒီလို မထုတ်ရတာ။ လက်မထုတ်ရဆိုတာ ဒီလို မထုတ်ရတာ' ဆိုပြီး ကိုယ်ဟန်အမူအရာ အပြည့်နဲ့ လုပ်ပြခဲ့တာပါပဲ။
တကယ်တော့ လူတွေက ကိုယ့်ရဲ့ စံတွေနဲ့ တိုင်းတာပြီး သူများဘ၀ရဲ့ ပျော်ရွှင်မှုကို တွက်ချက်တတ်ကြတယ်။ တစ်ခါတစ်လေ မြန်မာပြည်မှာ သိပ်ဆင်းရဲကြတယ်လို့ တွေးပြီး ကလေးတွေကို သနားမိတာက ရှိသေး။ တကယ်ကျ သူတို့က သူတို့ဘ၀မှာ ကျေနပ်ပျော်ရွှင်နေတာလဲ ဖြစ်နိုင်တာပဲလေ။ သူတို့နေရာမှာ မရှိရင် သူတို့ကို ကိုယ်ချင်းစားမပေးနိုင်ပါဘူး။ တွေးပြီး ခံစားကြည့်တာပဲ ဖြစ်မှာပါ။ အဲတော့ ကိုယ်မသိတဲ့ သူတို့ရဲ့ နေရာကို တွေးပြီး သူတို့ကို မဝေဖန်ကြဖို့ ကြိုးစားသင့်ပါတယ်။
No comments:
Post a Comment