လူသားတွေရဲ့ စွမ်းဆောင်နိုင်မှု စွမ်းရည်ဟာ မယုံကြည်နိုင်စရာ ကောင်းလောက်အောင် မြင့်မားနေတတ်ပါ တယ်လို့ ပြောတဲ့ အဆိုအမိန့်တွေကို ကြားခဲ့၊ ဖတ်ခဲ့တာ မရေမတွက်နိုင်အောင်ပါပဲ။ ငယ်ငယ်လေးကထဲက ရည်မှန်းချက်ဆိုတာတွေကို ကိုယ့်ကိုယ်ကို တွန်းအားပေးတဲ့ အနေနဲ့ ချရေးခဲ့ဖူးတယ်။ ဥပမာ (၃) တန်းကနေ (၁၀) တန်း အထိ အမြဲပဲ ဒုတိယ ရခဲ့ဖူးတဲ့ ကိုယ်က (၁၀) တန်းမှာ တစ်နိုင်ငံလုံး အဆင့်(၁၀) မှာဝင်ရမယ်လို့ တွေးခဲ့တာမျိုးပေါ့။ ဒါပေမဲ့ တကယ်ဖြစ်လာနိုင်မယ်လို့ ကိုယ့်ကိုယ်ကို ဘယ်တုန်း ကမှ မထင်ခဲ့ဘူး။ မရလာတော့လဲ သိပ်မခံစားရပါဘူး။ မြို့နယ်တစ်ခုလုံးမှာ ပထမ ဆိုတဲ့ အချက်နဲ့ပဲ ကိုယ်ကျေနပ်ခဲ့ဖူးတယ်။
အဲတုန်းက ဆရာက ပြောခဲ့ဖူးတယ်။ နင်က ရည်မှန်းချက်ဆိုတာတွေကို ချရေးပေမဲ့ အဲဒီ ရည်မှန်းချက်တွေကို လက်တွေ့ မဖော်ဆောင်နိုင်ဘူးလို့ နင့်ရဲ့ မသိစိတ်က အမြဲတွေးနေတာတဲ့။ နင်သာ တကယ်လိုချင်ခဲ့ရင် နင့် ရည်မှန်းချက်တွေက ပြည့်ကို ပြည့်မှာပေါ့တဲ့။ ကိုယ်က အကောင်းဆုံးဆိုတာကို လိုချင်ပေမဲ့ အဲဒီအရာကို မရရအောင် ယူမယ်ဆိုတဲ့ ခိုင်မာတဲ့ စိတ်မရှိဘူးလို့ ဆရာ ပြောတာကို မခံချင် ဖြစ်ခဲ့ဖူးတယ်။
အသက်အရွယ် ရလာတာနဲ့ အမျှ ဆရာပြောခဲ့တာက အမှန်တရားပဲလို့တော့ ကိုယ် ရင်နာနာနဲ့ လက်ခံခဲ့ရတယ်။ အဲကြောင့်လဲ ကိုယ်လိုချင်တဲ့ အရာကို အခက်အခဲ တွေ ကြားက ယူသွားတဲ့ လူတွေကို ကိုယ့်ဘ၀မှာ အားကျလာခဲ့တယ်။ သူတို့ လုပ်နေတဲ့ အရာအပေါ်မှာ ကျားကုတ်ကျားခဲ ကြိုးစားတဲ့လူတွေကို တွေ့တိုင်း မျက်ရည်ဝဲ လောက်အောင် အားကျမိတယ်။ (ဥပမာ ချစ်စမ်းမောင်၊လေးဖြူ)
ဒီနေ့တော့ ဆရာ ပြောခဲ့တဲ့ နင်သာ တကယ်လိုချင်ခဲ့ရင် နင့် ရည်မှန်းချက်တွေက ပြည့်ကို ပြည့်မှာပေါ့
ဆိုတဲ့ စကားကို ကိုယ် အကောင်အထည်ဖော်လိုက်နိုင်တဲ့ နေ့ပဲ။ ကိုယ်လိုချင်တဲ့ အရာတစ်ခု တကယ် ဖြစ်ပျက်လာတာကို မယုံနိုင်သလိုတောင် ခံစားနေရတယ်။ အသက် (၂ဂ) နှစ် မပြည့်ခင် ဖြစ်ချင်ခဲ့တဲ့ (တကယ် မဖြစ်နိုင်ဘူးလို့တော့ ရင်ထဲက ယုံကြည်ထားခဲ့ဖူးတဲ့) စိတ်ကူးတစ်ခုကို ဒီနေ့ တရားဝင် လက်တွေ့ အကောင် အထည်ဖော်လိုက်နိုင်တယ်။ ယုံတောင် မယုံနိုင်ဘူး။
တကယ်တော့ လူတွေက စိတ်ကူးယဉ်တယ်ဆိုကတဲက ကိုယ်နဲ့ နီးစပ်တဲ့အရာကိုပဲ စိတ်ကူးကြတာပါ။ အမြင်မှာ မနီးစပ်ဘူး ထင်ရပေမဲ့ စိတ်ရဲ့ တစ်နေရာမှာတော့ နီးစပ်နေပါတယ်။ အဲတော့ ကိုယ့်မှာ လိုချင်တယ်ဆိုတဲ့ စိတ်ကလေး ရှိလာခဲ့ပြီဆိုရင် ဖြစ်ကိုဖြစ်ရမယ်လို့ တွေးပြီး အချိန်နဲ့ အခွင့်အရေးကို စောင့်ပါ။ အခွင့်အရေး ရလာတာနဲ့အမျှ သွေးမကြောင်ပါနဲ့။ အမိအရ ဆုပ်ကိုင်လိုက်ပါ။
ဒီနေ့ ထူးချွန်ထက်မြက်သူတွေ အားလုံးကလဲ သူတို့ကို သူတို့ ထူးချွန်သူ ဖြစ်မယ်လို့ သိမြင်ပြီး ကြိုးစားခဲ့ကြတာ မဟုတ်ပါဘူး။ ဒီလိုပဲ ကြိုးစားရင်း မထင်မှတ်လောက်အောင် ထူးချွန်သွားတာမျိုးလို့ ထင်ပါတယ်။ ကိုယ်လဲ အဲလိုပဲ ကြိုးစားရင်း တစ်နေ့နေ့မှာ ပြောင်းလဲပေးနိုင်မဲ့ လက်ကလေး တစ်စုံ မဖြစ်ဘူးလို့ ဘယ်သူက ပြောနိုင်မှာလဲ။
No comments:
Post a Comment